Psalms 78

Isaleli vaya'ai hosu kava'apie'mo apava gemae

1Vaya'nimogitapae, hu'na, ali'na lapaya malegefe'mo huvanagi ge'nimo afiyo. Gemo lapa paigefe'mo huvanagi mani gemo alagepa hutapa afiyo. 2Akeya'vilaga kavafe'mo ae'na kalafefa gemo hu'na aepa'ae'mo lapa paiguve. 3Laginago vaya'mogi laha pai'nageta afi'nona gemo halate lapa paiguve. 4Lagaemo aeta ati okaeta Ala kava ne'mo'a lokiya kava'a'e hapau ai'naya kava'a'efe'mo ava gemo huta mafa'netie'mo hapa paiteta henaga'amo afole aisaya mafa'netie'mo hapa paigune. 5Agaemo Isaleli vaya'aife'mo ke'aepa ge'amo hapa pai'niya agufa gemo huno Yekopu aginago vaya'aife'mo ma kava hiyo, huno hapa pai'niye. Laginago vaya'aife'mo, ke'aepa ge'nimo mafa'netapimo alita apaya malege'apao ali'a apatesaya mafa'ne'apimogi afite'apae'mo mafa'ne'apie'mo halate hapa paiyo, huno hapa pai'niye. 7Afite'apae'mo Gotife'mo apakesamo afi'a fatago hute'a Goti'a hu'niya kavafe'mo apake okani'a ke'aepa ge'amo akame hugae. 8Apakinago vaya'mogimo himu'namu kava'mo hute'a ge'amo o'afi'a Gotife'mo apakesamo afi'a fatago osu'a atale'a u'nae. Fiku yanage'a apakae'e'mo ani kava'mo hu'a maigae. 9Ifalemi nofi vaya'mogimo ati'apimo alite'a u'naya'monanafa kame osu'a atale'a ai'a atagi ne'a e'nae. 10Apakaemo Goti kotalake ge'amo akame osu'a ke'aepa ge'amo ago amagi'a atale'nae. 11Hu'niya aune kavafe'mo ago apake kani'niye. 12Agaemo afo'apimogi apaulagale'mo Isipi kotega Sovani kote'mo aune kava'mo hu'niye. 13Solovala ani'mo'a folagapati'mo aino akaka vaelino ani anagamo haino hanete ani afelagamo lamino hanete hu'nige'a folagapati'mo u'nae. 14Agaemo felugamo hiya'mo uno hogoteno apavalelino u'niya kava huno hani'ilaga'e'mo ata vai'mo leno halelino uno hogoteno apavalelino u'niye. 15Agaemo ka'me kote'mo ani'mo ohane'niya kote'mo yafa'mo amagino apalo ati'nigeno afepati'mo alopa ani'mo haineno asagauno ai'nige'a ne'nae. 16Yafapati'mo alopa ani'mo emine'nige'a nege nege hu'a mai'nae.

17Hu'niya'monanafa ka'me kotegamo hogote vekamo anaga vekalegamo mago'e mago'e hu'a hosu kava'mo hute'a ge'amo ago amagi'a atale'nae. 18Gotife'mo, lahau'niya ne'ya'mo alika lamiyo, hu'a amalageka hu'nae. 19Apakaemo Gotife'mo hu'a faipa hu'a atete'apae'mo, Goti'a ka'me kote'mo alopa ne'ya'mo afa'a lamigifiye, hu'a hu'nae. 20Agaemo yafa'mo amagi'nigeno alopa ani'mo emineteno'ae'mo ani ani'mo afa'a he'niye. Ani kava'mo hu'niya'monanafa ne'ya'e afumo ame'a'e'mo afa'a lamigifiye, hu'a hu'nae. 21Hu'a hu'naya'mofe'mo Ala kava ne'mo'a afiteno'ae'mo lusi kava huno aipamo leno apate'niye. Yekopu vaya'mo atamo'mo emineno leno apasaga li'niye. Lagufamo alino katino lategaiye, hu'a apakesa afi'a fatago osu'naya'mofe'mo aipamo leno apate'niye. 23Apakesa afi'a fatago osu'naya'monanafa koku'nafe'mo aika akaka vao, huno hu'nigeno aino akaka vae'nigeno ko'mo aigekana huno mago ne'ya'mo agi'amo mana ne'ya'mo asagauno ai'nige'a ali'a ne'nae. 25Goti'a enisole vaya'mogi ne'ya'mo ma mopafi vaya'mo alino apami'nige'a ago ali'a ne'a apamu hu'nae. 26Agaemo, yasimo aliyo, huno hu'nigeno yegemo haine ne'eya kotegati'mo yasimo ali'niye. Himamu'aleti'mo yasimo aliyo, huno hu'nigeno aluga aluga haopalegati'mo yasimo ali'niye. 27Yasimo'mo nama anaga'mo mumusopakana huno lekana opaisaya agufa nama anaga'mo apavalelino e'nige'a e'a ani kahaepagana hu'a asagau'a ai'nae. 28Mai'naya folagapi'mo asagau'a aige muki seli note'mo asagau'a aige hu'a asagau'a ai'nae. 29Agaemo hapau'niya ne'ya'mo alino apami'nige'a ali'a ne'a apamu hu'nae. 30Ne'ya'mo afa'a alino lamigifiye, hu'a hute'a amalageka hute'a apakesamo afi'a fatago osu'naya'mofe'mo apami'niya ne'ya'mo ne'a o'nakai'a apavayafi'mo hanili'nageno'ae'mo Goti'a aipamo leno apateteno Isaleli vayapati'mo hogote lokiya vaya'age'mo ago apamagi'nige'a fali'nae. 32Ani kava'mo hu'niya'monanafa agaetegamo mago'e mago'e hu'age'mo hosu kavake'mo hu'a mai'nae. Aune kava'mo hu'niya'monanafa apakesa afi'a fatago osu'naya'mofe'mo afa ali'ya alite'a koli hume hume u'a fali'nae. 34Apamagi'nige'a fali'nage'apae'mo mago vaya'amogimo apaipamo ali'a afe le'a Goti'mo agesayafe'mo lokiya vai'a kahauya hu'nae. 35Apakaemo, Goti'a yagaino nelateya vekamo mai'niye. Lokiya vekamo'a laha ne'maeya vekamo mai'niye, hu'a halate apakesamo afi'nae. 36Kanale vekamo mai'niye, hu'a hu'nayana apaipafati'mo apakesamo afi'a osu'nafa apavaya'aletike'mo aigofe gemo hu'nae. 37Agaetefe'mo apaipamo kanale osige'a kotalake ge'amo ago amagi'a atale'nae. 38Ani kava'mo hu'naya'monanafa hau ayamopafi'mo hau'niya vekamo mai'niya'mofe'mo muki vaya'amo kamiti o'apamagi'nifa hosu kava'apige'mo alino atale'niye. Muki afina'mo aipamo lege lege huno mai'niya'monanafa ataleteno aipamo leno apate'niya kava'a'e'mo atale'niye. 39Agaemo, Vayatafa'mo mai'nae. Apava musa ne'aiya ya'mo malage huno hano nehiya kava hu'a ne'maiye, huno agesa afi'niye. 40Muki afina'mo ka'me kotegamo mai'ne'apae'mo ge'amo ago amagi'a atale'nageno'ae'mo aipamo'mo kana hu'niye. 41Apakaemo muki afina'mo Goti'mo amalageka huge Isaleli vaya'ai aote Goti'apimo ka'amo akani malege hu'a mai'nae. 42Apakaemo himamu'aleti'mo hu'niya kava'ae'mo ago apake kanige kame vaya'ai apayapati'mo apakufamo alino katino apate'niya kava'ae'mo ago apake kanige hu'nige'a apakesamo o'afi'nae. 43Hogoteno himamu'aleti'mo aune kava'mo Isipi kotegamo mago Sovani kote'mo hu'niya kavafe'mo apakesamo o'afi'nae. 44Agaemo alopa ani'e aise ani'e'mo alino kola ani'mo hamaleno ate'nige'a Isipi vaya'mogimo o'ne'nae. 45Agaemo asole kosi'mo alino apate'nige'a e'a hapaege eso'mo alino apate'nige'a e'a muki mopa'apile'mo hane'niya ya'mo ali'a hosu hu'a atege hu'nae. 46Agaemo mago kafamo alino apate'nige'a e'a hoya'apifi'mo hane'niya ne'ya'mo nege akenu'mo alino apate'nige'a e'a hoya'apifi'mo hakale male'naya ne'ya'mo nege hu'nae. 47Agaemo ko mopa ko'mo alino atale'nigeno emineno alagamo ne'aeya nofi'apimo amagino falu ati'niye. Agaemo hani'ilagamo ko mopagana huno lao ya'mo alino atale'nigeno emine'nigeno alagamo ne'aeya yosa hoya'apimo falu te'niye. 48Agaemo ko mopa ko'mo alino atale'nigeno emineno pulumaka'apimo apamagi'nige'a fali'nae. 49Goti'a aipamo leno apatege hai vaino apatege huteno hanageke ya'mo alino apami'nigeno apakafu ki'niye. Ani kava hu'a enisole vaya'mogimo apamagi'nage'a fali'nae. 50Aipamo leno apateteno'ae'mo afa'a apakeno o'apatale'nifa apamagi'nigeno kaita hapau'nige'a ago fali'nae. 51Agaemo Isipi kotega vaya'ai muki yege mafa'ne'apimo kamiti apamagi'nige'a ago fali'nae. 52Apamagi'niya'monanafa sipisipimo apavaleli'a ne'vaya kava huno vaya'amo ka'me kotegamo apavalelino u'niye. 53Alagepa huno yagaino apate'nige'a koli osu'a afa'a u'naya'monanafa solovala ani'mo'a kame vaya'apimo ago aeno apati kae'niye. 54Apavalelino uno aote mopale'mo himamu'aleti'mo ali'niya avele'mo apate'niye. 55Agaemo alu nofi vaya alu nofi vaya'mo ago alino hapa faitaleno mopa'apimo hapafaleno hakino apamiteno seli no'apifi'mo alino apate'niye.

56Ani kava'mo hu'niya'monanafa hogote anaga vekamo Goti'a amalageka hute'a himu'namu kava'mo hute'a ma kava'mo hiyo, huno hu'niya gemo ago amagi'a atale'nae. 57Afo'apimogi himu'namu kava'mo hute'a atale'naya kava hu'a mai'ne'a kayagi'niya kevemo hetalageno kahaufilagamo ne'viya kava hu'a atale'a hosu kate'mo u'nae. 58Apakaemo ave'ale ave'ale'mo aigofe goti'apimogife'mo mono hu'nageno'ae'mo aipamo leno apate'niye. Aigofe goti'apimo aune'amo alo hu male'ne'a mono hu'nageno'ae'mo hosu aipamo kali'niye. 59Goti'a apaketeno'ae'mo aipamo leno apateteno agai'a vaya'amo akame'ya apami'niye. 60Agaemo Sailo kotega seli mono nopi'mo ne'maiya nopati'mo ataleno u'niye. 61Agai'a vaya'amo hapa o'maeno kame vaya'apimo alino apate'nige'a e'a kame hu'a ae'a apakasete'a kotalake gemo hu male'niya kesimo kumaya alini'a u'nae. Ani kesimo apakae'e'mo ohane'niya kava huno himamu'a'e ha le konali ya'a'e'mo apakae'e'mo ohane'niye. 62Agaemo agai'a vaya'aife'mo aipamo leno apateteno kame vaya'apimo alino apate'nige'a e'a naipeleti'mo apai'nae. 63Kame hute'apae'mo neya vaya'apimo kamiti apai'nage'a fali'nage'apae'mo a'mafa'ne'apimo vele'mo o'mai'a afa'a mai'nae. 64Kame vaya'apimogimo mono hu'a ne'apataya vaya'apimo kamiti apai'nage'apae'mo a'ne'apimogimo yulagefa o'aige avi'ya hu'a o'apatege hu'nae.

65Ani kava'mo hu'a mai'nageno'ae'mo apaupati'mo he netiya kava huno Ala kava ne'mo he ti'niye. Lokiya vekamo'a nofi alagafati ani'mo neteno'ae'mo alopa gefati'mo ge nehiya kava huno Ala kava ne'mo malage huno he ti'niye. 66Malage huno kame vaya'amo alino hapa faino apatale'nigeno apavagage hu'nige'a u'a mai'nae. 67Agaemo vaya'ale'mo yagai'a apatesayafe'mo Yosefe aginago vayapati'mo lekana paino o'apateno apataleno uno Ifalemi nofi vayapati'mo lekana paino o'apateno apataleno uno Yuta nofi vayapatike'mo lekana paino apateteno Saiyoni avee'mo hau'niya avemo lekana paino ate'niye. 69Agaemo ani avele'mo mono no'amo avegana huno ki male'niye. Ma mopamo lokiya vaino hane'niya kava huno no'amo lokiya no'mo ki male'niye. 70Agaemo Yuta nofi vayapati'mo Nevini'mo lekana paino ateteno sipisipile'mo yagaino mai'niya kotegati'mo avalelino uno Isaleli vaya'aite'mo yagaino apatesiya kini vekamo ate'niye. 72Ate'nigeno Nevini'a ali'ya'alefeke'mo agesamo afiteno alagepa huno yagaino apate'niye.